محب صلاح (182 ترنيمة )

1-(عابرين دايسين كل الصعوبات.. أفراحنا بتعلن نصر أكيد
ووعود مليانة بحريات.. سلطان بيخلّي القلب سعيد)2

القرار-هو ضامني بيطمني.. قريب مني حبيبي يسوع
جه وندالي تغير حالي.. (ويا الغالي حبيبي يسوع)2

2-(عابرين شايلين في القلب هتاف.. و رايات مرفوعة لرب عظيم
وقلوب فرحانة وما بتخاف.. بتمجّد غافر قلب أثيم)2
3-( عابرين عايشين أحرار وياك.. خطاوينا بتشهد ليك بإيمان
بقلوب تشتاق تتمنى لقاك.. عابرين ومعاك لينا السلطان)2
4-( عابرين تاركين ليك أتعابنا.. أحمالنا في إيديك هاتشيلها
ترفعنا من بين ضعفاتنا.. نصرتنا وياك ضامنينها)2

القرار - شهوة قلبي ردية قوية مسكت فيَّ شوية شوية
حب المال بصحيح خلاني أعبده هو مش اللي اداني
هوّن ليَّ كل خطية

1- (شهوة قلبي صحيح جبارة رسمت ليَّ طريق بمهارة
بس لقيت في نهايته خسارة إيه يسوى حياتي الأبديّة!)2
2- (قلبي اختار مشوار و اتاريه ماشي في سكة عتمة وتيه
كل رخيص أنا كنت شاريه والغالي بعته بإيديَّ)2
3- (يا يسوع مد إيديك و انجدني حب المال مابقاش يسعدني
عن أغلى حبايبي بيبعدني حتى عن حبك يا فاديَّ)2

القرار - بين السكوت بين الكلام هزتني صرخة في الظلام
بصيت لقيت ابني يسوع ميت في أحضان الآلام

1- وفي لحظة حسيت بانكسار وعرفت إيه طعم المرار
ما لقيت دموع تبكي عليه لكن في قلبي الحزن نار
2- وبعدها جم ناس خدوه وبتوب حزين بيكفنوه
نسيوا إن أمه هاتندفن مطرح ما كانوا هايدفنوه
3- يا صليب ومعمول من الخشب ده عليك بدم ابني انكتب
ذنب ابن آدم اتغفر وبإيده ابني أنا اتصلب
4- قلبي ودقاته نواح عمري وملفوف بالجراح
وعيني ما هاتنسى الدموع ابني الوحيد يا ناس وراح

القرار - وبرغم جراحك يا فاديَّ وبرغم الدم المسفوك
دمعة ما بانت يوم في عينيَّ ماسألتش ليه يوم صلبوك

1- كان قلبي أعمى مابيشوفشي كان مليان بآثام وذنوب
باع حبك لكن ماندمشي سابك وإنت جريح مصلوب
2- ونسيت إن آلامك دية كانت يا إلهي علشاني
علشان توهب لي الأبدية شلت صليبي وخدت مكاني
3- بس يا ربي بقلبي الخاطي جيت أقدم توبة بدموع
جيت أقدم لك كل حياتي علشان أعيشها معاك يا يسوع

القرار - راح أخفف جرحك يا فاديَّ وهاصون الدم المسفوك
وأبشر بخلاصك ليَّ ما عرفت أنا ليه يوم صلبوك

1- فردت إيديك اديتني كتير قلت لي مخازني كلها ليك
فتحت بيبان السما يا قدير قلت لي يا ابني الخير في إيديك
وهبت لي قلب كبير قلت لي اسكن فيه وحديك
دايماً شاغلك في التفكير نقشت اسمي على كفيك
2- كل دي نعم اديتهالي ولسه كمان ياما بتدي
كل دي نعم بين إيديَّ وأنا دايماً باخد مش بادي
لإمتى هابقى أناني بطبعي ودايماً بافرد ليك يدي
وأرجع أخونك ربي بذنبي وأنسى يوم ما اديتك وعدي
3- ياما زرعت في قلبي محبة لكن قلبي قاسي وعنيد
كل ما ترمي فيه الحبة بيرفض يبقى زرع جديد
أرض قلبي قاسية صلبة وعايزة فاس من حديد
أصل أرض قلبي صعبة وإنت الزارع الوحيد
4- عيد تاني الزرع فيَّ علشان قلبي يرجع ويلين
ارمي بذور النعمة فيَّ يمكن تزيد في غرس التين
وأكيد راح أوصل للمياه بعد ما كنت في يوم تلاتين
وأرجع تاني أرضي حية تطرح حب ويا حنين

1- مابقاش الحب يكفي مابقاش الصدق يوفي
وفي عيني الدمعة تجري يا دنيا عايز أبكي
ودعت العالم وغرامه ودعته بأهله وبجراحه
وأنا كنت العايش في أحضانه ما لقتني باحب إلا مراره
2- يا حبيبي يا أحلى غرام ويا مصدر كل سلام
خليني كلمة بتعلى وبتعلى فوق الأوهام
وبتحكي أحلى كلام وبتشفي كل آلالام
وتغني مع الأيام وتعدي فوق الأحلام
3- وهاسيب الدنيا بحالها لا أنا منها ولا سكانها
وتروح الأرض بمالها وهايفضل بس خالقها
وأنا هافرح باللي شراني دي الدنيا مش سايعاني
وبلمسة واحدة شفاني دي السما كلها علشاني

1- ياللي بتجرح قلب غيرك من غير رحمة أو إحساس
هي دي وصية إنجيلك إنك تجرح كده في الناس
راجع نفسك قبل كلامك وأعرف معنى الكلمة إيه
قبل ما ينطق كلمة لسانك شوف من الكلمة بتقصد إيه

القرار - واعرف إن الرب يسوع حبه بيستر أي عيوب
ليه في الشر تعيش مخدوع اعرف معنى الحب وتوب

-2 تكنز تبني مخازن خيرك كلمة عايز هي ردك
تسرق دايماً حاجة غيرك وتقول حقي ده مش حقك
بكره تقدم كشف حساب قوللي بس هاتعمل إيه
العدل ده طبعه وعمره ما غاب ربي يسوع سهرانة عينيه
3- الحق قدم توبة وتوب قبل ما تلقى مصيرك ضاع
ابكي اندم ع الذنوب عش بالروح وفي اتضاع
قبل ما بكره العمر يفوت مش هايفيد ندم وعتاب
ليه تحرم نفسك من الملكوت وهو فاتح ليك الباب

القرار-(حقك أنهار أنهار يشبع سنين الجوع
وحدك جبار جبار عالي وصوتك مسموع)2
(ونهار وليل جيل ورا جيل)2
تسبيح... وهتاف... ترنيم... و رايات ليسوع

1-(وعدك في قلوب محفوظ يهدم أسوار الشوك
وسنين مهما تدور غرقان صوت الشكوك)2
2-(في الحرب عينينا عليك نصرتنا زي النور
بتبان لما إيديك بتفُك قيود المأسور)2
3-(وقلوب تحتاجلك تسبيها وتبارك فيها بإيمان
ترويها ويدك تشفيها وتبدد فيها الأحزان)2

1- (لا مش هابكي أغلى حبايبي مهما فراقهم أثّر فيَّ
راضي أنا بنصيبي ونايبي واللي بيقسمهولي فاديَّ)2
(نسمة روحه بتعمل فينا كلنا ملك إيديه و صنيعته
والدمعة ليه تملا عينينا لما بيطلب تاني وديعته؟)2
2- (الأحزان زادت حواليَّ ربي سمح بيها وجربني
كانت تجربة قاسية عليَّ لكن ليه يسوع بتجربني؟)2
(مش راح تبكي في لحظة عيوني ولا يوم الأحزان تأسرني
اللي فاتوني دول وحشوني باطلب من ربي يصبرني)2

1- يا مُحبّاً ماتَ عن جنسِ البشرْ أمحُ إثمي أنت أولى من غفر
كُن مُعيناً فأنا ممّن عَثَر بالخطايا يا حبيبي يا يسوع
2- أنتَ حِصني وإليكَ المُلتجا مِنكَ ألقى بالتجائي الفرج
فأعن ضَعفي ووطّن بي الرَّجا بِخلاصي يا حبيبي يا يسوع
3- أنتَ تَدعو الخاطئ الغرَّ الأثيم لِينَال الخُلد في دار النَّعيم
وأنا مهما يَكُن ذَنبي عَظيم لَك آتي يا حبيبي يا يسوع
4- أنتَ من تُحيي رجاءً في القلوبْ بهداية المجد إن كانت تَتُوب
أنتَ غفّار الخطايا والذُنوبْ فَامحُ إثمي يا حبيبي يا يسوع
5- تِهْتُ في وادي الخَطا فانظُر إلي واهدني طُرق الهُدى وأشفق عليْ
وأنا كُل الثنا ما دمت حي لَك أُهدي يا حبيبي يا يسوع
6- يا كَريماً جاءَ من أعلى سماهْ لكَ حَمدي كُل حينٍ في الصلاة
وإذا ما جاءَني يومُ الوفاة لكَ نَفسي يا حبيبي يا يسوع