وعدتك (11 ترنيمة )

1- أيوه وعدتك بس قسيت لحظات ضعفي خدتني بعيد
هنت علي وسبت إيديك بس بعيد أنا بابقى وحيد
القرار- نفسي إرادتي تكون غلباني وأقدر أعيش في رضاك مرتاح
أنسى الخوف وساعات الحيرة تلمس ضعفي تهدي رياح
2- شايف لمعة عيني وعارف إنك ساكن روحي وقلبي
وكفوفي المفتوحة بتطلب ربي بتعلن ليك عن حبي
3- عمري ما فكرت أجرح فيك باضعف لكن من غير قصد
حبك جوه ضلوعي بيجري ولا بارتاح أبدًا في البعد

1- علمني أبل ريقك وأسقيك مية صلاتي
تشبع من شبعي بيك وترجع لي حياتي
القرار- رجعني ليك حبيبي حنن قلبي عليك
بدل قلبي الحجر بقلب يحس بيك
2- على رجلك قلبي يركع اغفر لي الماضي كله
اغسلني من ذنوبي اهديني وقلبي دله
3- ساعدني أوفي وعدي ماجرحش تاني فيك
حطم قبر الخطية قومني يارب بيك
4- حنيت للعيشة معاك وواحشني يارب رضاك
أنا سبتك باختياري لكن ماليش سواك

القرار- نايم وعيونك حارساني عايش ودراعك سانداني
إيه أنا أكون من غيرك إنت دا إنت حمايتي وسر أماني
1- ليه مانادتش بدري عليك باهرب بس منك ليك
ساكن جوه حبة قلبك لكن قلبي قاسي عليك
2- خايف جواك بتخبيني تايه إيديك راح تهدييني
روحي معاك مرتاحة ياربي أطلب تعطف تملى يميني
3- حبك طعم ومعنى حياتي ليك القلب وكل صلاتي
خيرك خضر أرضي البور إنت ياربي وجودي وذاتي

1- مابخافش من الخطر علشان في قلبي نعمتك
مابخافش من الخطر واثق في صدق محبتك
القرار- مهما يدقوا جرس الخطر ولا يتوهوا كل البشر
صوتك ماليني سلام يحميني م الريح والمطر
2- عودتك قلبي يسمعك أضعف تقوللي هارفعك
رفعتني فوق الجراح توهبني قبل ما أسألك
3- جوه في عينيك نيمتني في كفوف إيديك نقشتني
مين اللي يقدر يا يسوع يأذيني وإنت بتعتني

1- آخر لحظة يأس في عمري ودعتها وقابلت عينيك
مش باكي على حاجة في عمري غير اللي ماعشتوش حواليك
القرار- سبت أنا كفني في قبري خلاص مش هارجع أموت وإنت حييتني
عدى كتير وأنا ناسي ياربي إن بدمك إنت فديتني
2- ارمي عشاني في بحر أثامي طوق أمسك فيه وتنجيني
اهدي خطايا وكون ويايا من شر العالم خبيني
3- باصرخ ليك وأنا مادد إيدي عايز أعيش الفرحة معاك
تملى حنايا القلب يا سيدي دوقني ع الأرض سماك

1- رغم الضيقة ورغم الجرح سامع صوتك جوه في قلبي
وأنا تعبان محروم م الفرح عارفك دايمًا واقف جنبي
القرار- عيني عليك مستني تعود تملى بنورك قلبي المطفي
اقفل جرحي وحط ورود ارفعني دا أنا مايل مكفي
2- اسندني واديني سلام خلي الحزن في روحي ينام
والكلمة تقويني في ضعفي وتهون لي الأيام
3- لم الشوك من زرع العالم ياللي بحال أولادك عالم
ليك سلطان ع الشر يا ربي ما إنت أبويا وفي قلبك نايم

1- جيت ياربي قصاد عينيك محتاج قوة تردني
كل خطوة ماشيها ليك شايلة هموم بتهزني
القرار- دم إخواتي ينادي ويصرخ دوست عليه ولمسته وشوفته
دقلديانوس قام من قبره عايز يرجع تاني بوقته
داير يحصد أي صليب مرسوم في ملامح أولادك
واللي نادى باسم يسوع قتله بغدر وكتبوا نهايته
2- هدوا كنيستي يارب انجدني جوه في قلبي النار تحرقني
على شهدائك اللي انبدحوا ع الظلم اللي في جوفي واكلني
3- إنت هزمت الموت علشاني وأنا وياك هاغلب أحزاني
يبعد خوفي بلمس إيديك واثق عمرك ما هاتنساني

1- لما الفجر يقابل ليلك لما الشمس تنور عينيك
لما نهار الدنيا يحاوطك يملى بأمله ونوره طريقك
القرار- خليك فاكر إن إلهك كل صباح مش ناسي يعولك
من خير إيده تشبع دايمًا م البركة راح تلقى نصيبك
سايب نفسك جوه عيونه صوته مصاحبك هو دليلك
وقت الضيقة يكمل ضعفك أب حنين هو صديقك
2- لما تلاقي الزاد والمية وتدوق طعم النوم الهادي
واحتياجاتك متلبية ويكون فرحان راضي
3- لما تحس إنك مطمن ماسك إيد ربي الحنان
لما يدفي الروح بأمانه تتبسم وتقول له كمان

1- احتياجي ليك ياربي جوه مني بيناديك
يرتجف قلبي في ضلوعي ضمني خبيني فيك
القرار- رجع العمر اللي راح خدني م الضيق للبراح
بين إيديك تنام خدودي المسني داوي الجراح
2- حاسس إني حد تاني اتهديت ابنيني تاني
اخلق م الطين لي عين خليك ستري طول زماني
3- ضعفي مالي القلب حزن حملي زاد ومين يعينني
باصرخ ليك يا يسوع تعالَ لم جرحي اللي واجعني

1- ويا الطير طيرني يارب أعلى فوق جراحات القلب
فوق هم الأحزان ارفعني علمني أسامح وأحب
القرار- وسط الزرع أكون الغصن شايل زهرة خير في فروعي
وباسمك تهدم أسوار تسند قلبي وتشبع جوعي
2- ويا السمك أروح للعمق وألمس قلبك قوي من جوه
ترويني من مية عطفك وتبدل لي الضعف بقوة
3- ويا الشمس شروقي يكون نور من عيني لقلب الكل
مايغيبش نهاري طول ما إنت على كل حياتي بتطل
4- ومع الريح أبقى نسمة حب صافية بتطبطب ع القلب
أصل يسوع خلاني معاه أخد قوة ماخدهاش حد

1- أجيب منين حروف تعبر ومين دا قوللي يارب يقدر يحس بي
وسط الألم وسط الظروف وأما أتنفض وأعيش في خوف تاخد إيدي
القرار- حبك في قلبي هزني يارب نفسي تضمني وأنعس في حضنك
خدني حنيني لنظرتك بارسم لقلبي ضحكتك لما أقولك
باحبك أنا تخطفني ياربي باحبك أنا مش عارف أخبي
2- حضنت دموعي ضحكتي في صلاتي حبي يتحكي
مشتاق إليك ملهوفة عيني تلمحك تاخد إيدي بلمستك خبيني فيك